31.3 C
Manila
Tuesday, April 23, 2024

General Santos: First round sa national vaccination days sa Sarangani province nakabakuna og 71,298 ka mga indibidwal, second round gipangandaman

- Advertisement -

Malipayong gibalita ni Ms. Razel Bustria, ang provincial vaccination coordinator ilalum sa opisina ni Provincial Health Officer Dr. Arvin Alejandro, nga nagmalampuson ang first round sa pagpahigayon og tulo (3) ka adlaw nga National Vaccination Days kon Bayanihan Bakunahan sa probinsya sa Sarangani.

Visit RPN DXDX General Santos

Ebidensya niana ang 71,298 kabuok mga Sarangan nga nagpabakuna atong mga adlawa sa ilang first ug second dose. Ang maong ihap ang dakong gidungag ug gitampo sa COVID-19 vaccination turnout sa Sarangani Province kung diin nikabat na karon sa 162,680 ka mga taga-Sarangani ang nabakunahan sa 1st dose samtang 77,574 ang nabakunahan sa 2nd dose, as of December 3 data.

Paabuton lang ang usa (1) ka bulan una mabakunahan sa 2nd dose ang bag-uhay lang naka-1st dose, gawas sa brand nga Janssen nga kausa lang turukan. As of December 3 nga record sa Sarangani Provincial Health Office, nakatala ang lungsod sa Maitum nga adunay pinakadaghang nabakunahan basi sa target population, samtang ulahi ang munisipyo sa Glan.

Ang pagdugok sa mga katawhan sa Sarangani sa national vaccination campaign ang nagpamatuod nga daghan na ang nahigmata sa kamahinungdanon sa pagpabakuna. Walay kalabutan dinhi ang pagtuo sa relihiyon kundili ang pagsalba sa henerasyon sa tao aron dili mapagan sa pandemya.

Sa kasamtangan, nangandam na ang LGU Sarangani sa kamanduan ni Governor Steve Chiongbian Solon kuyog ang mga maabtikong mayor, sa pagsuporta nila Vice Governor Elmer De Peralta, mga board member, Senador Manny ug Congressman Ruel Pacquiao, ug mga kugihan nga vaccination volunteers alang sa ipahigayon nga ikaduhang round o ikaduhang wave sa Bayanihan Bakunahan nga gituuhang matigayon sunod semana, Disyembre 15 hangtud Disyembre 17.

Apan kadtong naka-desisyon nga magpabakuna ang dili na hulaton ang national vaccination days kundili adtuan lang ang provincial, municipal o barangay health center ug mga municipal hospital gumikan adlaw-adlaw gadawat sa magpabakuna.

Aduna napuy bag-ong variant sa COVID-19 nga nigutho gikan sa nasud South Africa gitawag nga Omicron. Sama sa gibalik-balik sa pagbalita, dili bag-o sa kalibutan nga masugamak sa mga pandemya. Tuig 1918, lagpas 100 ka tuig na ang nilabay, ni-atake ang makalilisang nga Spanish influenza.

Nipatay og 50 milyon kabuok tao entiro kalibutan ang mao nga Spanish flu. Hinay-hinay usab kining nawala nahimo na lang ordinaryong flu gumikan sa kalambuan sa bakuna atong mga panahuna.

Aminado ang PHO Sarangani nga aduna pay pag-alanganin ang uban sa pagpabakuna. Hinungdan nga adunay inisyatibong gimugna nga “Mobile Vax Team” ang buhatan ni Dr. Alejandro subay sa memorandum ni Governor Solon, kaabag ang mga municipal health office, barangay kapitanes ug barangay health stations.

Gapanulod ang Mobile Vax Team sa mga kabarangayan bisan sa kabukiran, aron mapasabot sa mga residente, ug dili maminaw sa mga fake news.

Gidayig na lamang sa PHO Sarangani ang inisyatibo sa mga munisipyo, sama sa LGU Alabel, nga ginadungan ang pagbakuna sa ginapahigayon nga mga medical mission ug munisipyo sa barangay program aron one-time ang paghatud sa mga serbisyo.

Sa Maitum, adunay pa-premyo ang LGU Maitum sa unang tulo ka barangay nga makakuha og 70% vaccination turnout, gipanagaan pud og mga kinilong bugas ang mga nabakunahan.

(Source: PIO-Sarangani)

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -