Gibisita ni Senator Christopher Lawrence “Bong” Go Sabado ang Barangay Calumpang sa General Santos City aron ihupay ug hatagan og tabang ang mga pamilya nga nawad-an og panimalay human nasunogan atong Nobyembre 03.
Ang buhatan sa senador ug nagkadaiyang ahensiya sa gobyerno ang nagkauban alang sa relief efforts sa evacuation center nga nahimong temporaryong gipuy-an sa mga nasunogan.
Nahatagan og pagkaon, financial assistance, food packs, vitamins, mask ug ubang tabang ang 591 ka pamilya.
Naghatag usab kini og bike, sapatos ug 15 ka computer tablet alang sa educational use sa mga bata nga benepisyaryo.
“Timan-e ninyo ang gamit ato lang mapalit, ang kwarto ato lang Makita, maningkamot lang ta trabaho lang ta, pero ang kinabuhi dili mapalit og kwarta ‘a lose life is a lose life forever’, ayaw mo kaguol magtinabangay lang ta naa lang me diri ang importante buhi ta,” asoy ni Go.
Samtang, naghatag og financial assistance, food packs ug kitchen kits ang Department of Social Welfare and Development (DSWD), hygiene kit ug masks usab ang gihatag sa Department of Health (DoH).
Nanghatag ang Department of Agriculture og ‘seeds’ sa gulay ug prutas samtang ang Department of Trade and Industry ug National Housing Authority ang nagpahigayon assessment sa posibleng beneficiaries sa housing ug livelihood assistance program.
Mohatag usab og skills training program ang Technical Education and Skills Development Authority (TESDA).
Giawhag usab ni Go ang pamilya sa nasunogan nga moadto sa Malasakit Center aron mahatagan sila og medical assistance. (BGNFM)