Final draft ng SONA inaasahang isusumite kay Duterte ngayong araw

Inaasahang isusumite na kay Pangulong Rodrigo Duterte ang final draft ng State of the Nation Address (SONA) ngayong araw.

Ayon kay Sec. to the Cabinet Karlo Alexi Nograles, isinasapinal na ang mga input na mula sa iba’t ibang ahensya ng pamahalaan na magiging batayan ng speech sa SONA ng pangulo.

Gayunman, nasa pangulo pa rin aniya ang pasya kung may nais itong tanggalin o idagdag sa kaniyang magiging talumpati.

Samantala, magkakaroon din umano ng rehearsal si Pangulong Duterte sa linggo ng kaniyang speech kasama  si Bb. Joyce Bernal na nagsisilbing direktor ng SONA.