Update 11:00AM (July 08, 2020)
Pabalik na sa Surigao City si Charlie Espinosa, hepe sa Emergency Response Services kaiban ang duha ka mga ambulance crew nga nakalingkawas sa kamatayon nga sila si Ji-an Paulo Jack Azarcon, 23 anyos nga helper ug nurse sa Caraga Regional Hospital nga si Jonah Odrona, 28 anyos. Apil usab nga gidala nila ang patay’ng lawas ni Marlon Olasiman, 37 anyos nga driver sa ambulansiya sa syudad. Sayo kagaina milarga si Espinosa paingon sa Tagum City human nahibaw-an nga nabangga ang ambulance didto sa highway sa Baranggay Bincungan sa maong syudad dihang pauli na gikan naghatud ug pasyente didto sa Southern Philippines Medical Center sa Davao City.
Kasub-anan kuman sa mga personahe sa ERS sa Surigao City ang nahitabong disgrasya sa ilang kaubanan.
Sa exclusive interview sa Radyo Ronda kang Charlie Espinosa, nibiyahe ang ambulance no.18 sa syudad kagahapon paingon sa Davao City aron paghatud sa pasyenteng taga Brgy. Quezon nga dili na makalakaw human natumba sa kasilyas.
Pagpauli na nila, mi-overtake an ambulance nga gimaneho ni Olasiman sa isa ka 10-wheeler truck apan may gikasugat usab kini nga laing truck hinungdan nga gikabig sa driver ang manobela ug didto mibangga sa steel barrier. Gisaysay ni Jonah nga nakamata siya sa wala pa ang disgrasya samtang tulog ang iyang kaubanan. Samdan sa ulo si Azarcon samtang mihubag ang kamot ni Jonah. Latâ ang tiil ni Marlon tungod sa nalugpitan kini sa pagkabangga samtang may lagum sa tiyan. (RPN DXKS)
