Mabolokong gipahigayon ang “Blessing sa City Hall ug Switch-On Ceremony” sa Pasko sa Dipolog (PASADI) 2021 sa kagamhanang lokal ning dakbayan kagahapon, Nobyembre 26, ning tuiga nga gisugdan sa alas 4:00 ang takna sa hapon.
Sa unang bahin sa programa, gipahigayon ang pag-blessing sa bag-ong City Hall ug sa Plaza Magsaysay pinaagi ni Bishop Severo Cagatan Caermare, ang atong obispo sa Diocese sa Dipolog.
Human sa gihimo nga pag-bendisyon ni Bishop Caermare, gisunod ang usa ka hamubong programa isip timaan sa pagbukas sa PASADI 2021, diin tipik niini, mipabati sa ilang pakigpulong sila si City Mayor Darel Dexter T. Uy, Governor Roberto Y. Uy, 2nd District Representative, Glona G. Labadlabad ug Kanhi Dipolog City Mayor Evelyn T. Uy.
Inubanan sa pagdalit sa diyotay nga mga pasundayag alang sa mga tumatan-away, sama sa awit ug sayaw, maoy mihatag og dugang bolok sa maong kalihokan.
Sa katapusang bahin sa nahisgotang programa, gihimo ang hiniusang pagpasiga o “switch-on” sa mga paskohanong suga nga gi-adorno dinhi sa pipila ka mga dapit sulod ning dakbayan partikular na sa City Hall, Plaza Magsaysay, P”gsalabuk Circle, Airport Rotonda, Dipolog Boulevard, Central Public Market ug uban pa, nga maoy mipabuhi sa espirito sa kapaskohan dinhi sa atong dakbayan ug dugang naghatag sa dugang bolok ug kadasig sa atong tagsa-tagsa ka mga kaugalingon.
Ang maong kalihokan ang gitambongan sa dinapit nga mga bisita, diin gawas nila ni kanhi Mayor Evelyn T. Uy, Gov. Uy ug Congresswoman Labadlabad, mitambong usab sila si City Vice Mayor Horacio Velasco, uban sa pipila ka mga konsehales ning dakbayan.
Lakip sa mitambong sila ni ZN Police Provincial Director, Col. Giovanni Hycinth Callao, Dipolog City Acting Chief of Police, Lt. Col. Edwin Verzon, RTC Judge Jose Rene Dondoyano, City Prosecutor, Herminia Enero ug Provincial Attorney, Jms Cyril Ruiz.
Lakip sa misaksi usab sa pagpahigayon sa maong kalihokan mao ang pipila ka mga opisyal ug kawani sa kagamhanang lokal ning dakbayan, mga personahe sa Bureau of Fire Protection sa pagpangulo ni F/Sr. Insptr. Edgar A. Quitoy, mga persone sa Dipolog City Police Station ug sa pipila ka higala gikan sa media, tanan dinhi sa dakbayan.
Ang pagpahigayon sa nasangpit nga “Blessing ug Switch-On Ceremony” ang mahimong malantaw usab pinaagi sa Facebook Live @ Dipolog City Government Facebook page, alang niadtong wala nakakita niini kaganihang hapon dinha sa tugkaran sa Museo Dipolog.
Matud pa, nga bisan ania pa kita panahon sa pandemya, apan dili usab nato paga-hikalimtan ang pagsaulog sa panahon diin ang atong manunubos ang natawo, nga maoy naghatag kanato sa igong kadasig, pagmaya, ug paghigugma sa usag-usa.
(News and photo courtesy of Dipolog City Government Facebook page)