Giturn-over sa kagamhanang lokal sa Dipolog sa pagdumala ni Mayor Darel Dexter T. Uy ang napulo (10) ka units nga photocopier machines ngadto sa DepEd-Dipolog, sa may alas 9:00 ang takna sa buntag, Nobyembre 4 ning tuiga, didto sa buhatan sa City Schools Division, sa Barangay Olingan, ning siyudad.
Sumala ni Mr. Ronillo Yarag, ang Education Program Supervisor, LRMS (Learning Resources Management System), ang pundo niini nagagikan sa Basic Education Learning Continuity Plan (BELCP) nga gi-allocate aron makatabang sa mga eskwelahan alang sa pag-printa og mga modules. Dugang ni Yarag, nga nakita sa DepEd-Dipolog nga nangaguba na ang mga printer sa mga tulonghaan og kinahanglang tabangan kini aron dili ma-paralyze ang reproduksiyon sa mga modules, busa sila sa DepEd dako ang pasalamat ngadto ni Mayor Uy nga mihatag og pundo alang ning mga makinarya aron masulbad ang problema sa reprodukisyon sa mga modules.
Dugang nasayran nga kining (10) ka photocopier ihatag usab ngadto sa napulo ka mga distrito dinhi sa dakbayan.
Samtang si Mayor Uy ang midasig sa mga magtutudlo nga ipadayon ang ilang pagpaningkamot aron maka-umol og maayong mga magtutungha nga puhon mao na usab ang modumala sa kagamhanan. Nanghinaot ang mayor nga kining mga makinarya nga gihatag sa lokal nga kagamhanan ang makatabang alang sa paspas nga reproduksiyon sa mga modules aron dili malangan og dili mabalda ang pag-eskwela sa mga bata. Wala kalimti sa mayor ang pagdasig nga magpabakuna na aron ma-proteksiyonan kontra COVID-19 virus.
Nasayran nga ang matag usa ka unit sa nasangpit nga photocopier nagkantidad og kapin kon kulang Php149,000.00 og kini makahimo usab sa pag-risograph og mga dokumento.
Mitambong sa simpleng turn-over ceremony didto sa DepEd-Dipolog mao si Mayor Uy, City Schools Division Superintendent, Dr. Virgilio Batan, Jr. ug mga School Principals gikan sa napulo ka mga tulonghaan dinhi sa Dipolog.
(Source: City Information Office | Dipolog City Government Facebook page)