Dili matago ang dakong kalipay’ng gibati sa katawhan sa barangay Linabo sa lungsod sa Polanco, human malampusong gi inugurahan sa miaging adlaw ang bag-ong paga trabahoon nga ikaduhang hugna pag semento sa dalan sa barangay, gikan sa barangay Dilawa, Piñan ngadto na sa Linabo, Polanco.
Ang maong proyekto gipunduhan sa local nga kagamhanan pinaagi sa mayor niini nga si Evan Hope Olvis, nga gipahatan og dos punto singko milyunes ka pesos. Nasayran nga ang maong paga sugdan nga proyekto sumpay sa dalan nga una nang gi semento sa LGU Polanco kaniadtong 2019 nga may pahat usab nga singko milyunes ka pesos.
Sa mensahe ni mayor Olvis, iyang gipaabot sa katawhan nga iyang paningkamotan nga ma kongkreto ang maong dalan aron masayon na sa katawhan ang pag agi niini. Kini bisan hinay-hinay apan kanunay nga gi gahinan sa local nga gobierno.
Gipaabot ni mayor Olvis nga adunay dugang paga tukuron nga proyektong spill way nga gi punduhan sa kongresista sa unang distrito. Gipasalamatan ni mayor Boyet Olvis ang Ginoo diha na sa kanunay nga pag giya kaniya, sa angay nga buhaton para paghatag og kaayuhan para sa tanang katawhan.