Gihimo ang transect walk sa upat ka mga estasyon aron mapakita ang mga nagkadaiyang pananom sa mga nagkadiyang model farm ilawom sa Sustainable Land Resource Management Approach (SLRMA) Project atol sa gihimong Farmer’s Field Day sa Barangay Barcelona, adlawng Huwebes.
2019 dihang gisugdan ang SLRMA Project ug mas napalapdan milabayng tuig ug nagpadayon hangtod karong tuiga dihang mitugot si Badong Sybico nga abangan sa Panggamhanang Lokal ang gipanag-iyang yuta nga di moubos sa 80 ektarya nga gitamnan karon sa kamoteng kahoy, pinya, saging, mais ug kamote.
Matud ni Engr. Eduardo V. Alberto, sa Bureau of Soils and Water Management nga andam ang ilang buhatan sa pag-ayuda sa mga mag-uuma pagtudlo sa insaktong pamaagi sa pagtikad sa yuta aron molungtad ang produksyon sa ilang umahan nga makatabang sa pagpalambo sa ekonomiya ug ang mga produkto makakumpetensya na sa global market.
Sa mensahe ni Mayor Rosalina Jalosjos nga gipabati ni Ronnie Jarapan, city councilor ug chairman sa Committee on Agriculture, nga importante ang papel sa mga mag-uuma sa komunidad kay kun dili agi kanila, wala’y mabutang nga pagkaon sa matag-lamesa kada-pamilya.
Gipasidunggan sab sa Panggamhanang Lokal ang pamilya Sybico sa pagparenta sa ilang yuta.
Dako ang pasalamat ni Jose D. Manguerra, hepe sa Soil Conservation Management Division (SCMD), sa mga gilugway nga tabang gikan sa mga nagkadaiyang ahensya aron mapatuman ug mamahimong malamposon ang proyekto sa Sustainable Land Resource Management Approach (SLRMA).
Mapasalamaton sab ang 54 anyos nga mag-uumang si Myrna Adaya, nga myembro sa Casava Growers and Processors Association (CAGAPA) kay hinay-hinay nga miasenso ug natabangan gikan sa kalisod ang iyang pamilya.
Naglugway si Mayor Jalosjos og libreng patraktor alang na sa usa ka ektaryang yuta ug libreng krudo agi sa City Agriculture aron matabangan ang mga mag-uuma sa ilang mga galastohan sa pagpananom.
(News and photo courtesy of City Information Division-CID-Dapitan Facebook page)
