Davao City – Binawi ni Barangay Cabantian Barangay Chairman Nilo Cabiles ang ginawa nitong polisiya na “No Vaccine, No Transaction Policy” matapos itong umani ng maraming batikos mula sa mga netizens at sa kanilang mga constituents.
Imbes sa “No Vaccine, No Transaction Policy” magpatupad na lang ito ng “No Vaccine, No Entry Policy “ sa kanilang barangay hall. Naglagay din ng designated transaction area sa labas ng barangay hall para sa mga kliyente na hindi pa bakunado kontra Covid-19.
Sa facebook page ng Barangay Cabantian ay humingi ng dispensa si Barangay Chairman Nilo Cabiles at tahasan niyang sinabi na binawi na niya ang nasabing polisiya.
“Ako po ay taos-pusong humihingi ng paumanhin sa aking naging desisyon at akin po itong binabawi. Ito po ay sa kagustuhan kong mapangalagaan at maproteksyunan ang karamihan sa ating mga ka barangay. Kung pagkakamali man ito, lubos akong humihingi ng paumanhin sa mga naapektuhan.” Ayon kay Brgy. Kapitan Cabiles sa nasabing post.
Patuloy na magbibigay serbisyo ang Barangay Cabantian sa mga residente nito na nangangailangan ng kanilang serbisyo. Nanawagan din ni Kapitan Cabiles sa mga residente ng Barangay Cabantian, Buhangin District na magpabakuna na kontra Covid-19.
(Source: Barangay Cabantian Facebook Post)