Cebu City- Dili pa angay nga ibutang ubos sa GCQ o general community quarantine ang dakbayan sa Lapulapu karong panahona.
Kini ang gipadayag ni Mayor Junard Chan ngadto sa mga sakop sa media.
Sumala pa ni Chan, naghunahuna siya pagpatuman og mas relax nga regulasyon sa siyudad apan dili lang una karon.
Matod ni Chan, magpabilin ang ECQ sa Lapulapu tungod sa padayong pagsaka sa ihap sa mga nataptan sa virus.
Gani, pagka Martes, Mayo 12, miabot na og 48 ang tanang kaso tungod sa nadugang nga unom diin 24 ang naulian ug usa ang namatay.
Una niini gipahibawo sa Malakanyang nga lakip ang Lapulapu sa mahimong ipaubos sa GCQ sugod sa Mayo 16 hangtod sa 31, segun sa rekomendasyon sa Inter-Agency Task Force for the Management of Emerging Infectious Disease.
Apan alang sa mayor, dili pa andam ang siyudad sa GCQ busa dili lang una nila kini sagopon.
Nagkanayon si Chan nga dili mahimong ibutang niya ang mga Oponganon sa peligro kay ang kaluwasan sa tanan maoy iyang top priority.
