Cebu City-Giangkon sa netizen nga dinakpan sa Cordova, Cebu nga na-hack ang iyang Facebook busa dili na siyay nag-post batok sa presidente.
Nasayran nga giarestar si Ma. Catherine Ceron, 26, gahapon sa buntag sa mga sakop sa Criminal Investigation & Detection Group o CIDG 7 tungod sa iyang pagtanyag og 75 milyones pesos nga ganti sa makapatay kang Pres. Rodrigo Duterte pinaagi sa Facebook.
Gipadayag pa sa social media ni Ceron nga wala na siya mahimuot sa binuhatan sa presidente.
Nasikop si Ceron sa mga awtoridad sa sityo Tumoy, brgy. Ibabao,, Cordova.
Atol sa call conference, gidaygan ni  Major Ronald Allan Tolosa, deputy director sa CIDG-7, ang mga reporter nga si Ceron nangangkon nga na-hack ang iyang Facebook ug dili siyay nag-post sa ingon.
Matod ni Tolosa, kon tinuod ang gisulti ni Ceron, iya na lang nang pamatud-an sa korte kay ila man gyod kining ikeha.
Nag-ingon ang post ni Ceron nga kon kinsa man kadtong makabasa, ipapatay si Duterte kay mohatag ang grupo og P75 milyones nga ganti.
Si Ma. Catherine Ceron nga gitanggong na sa holding cell sa CIDG 7 gitakdang pasakahan og  kasong kalapasan sa  Article 142 sa Revised Penal Code o Inciting to Sedition nga adunay piyansa nga 400 mil pesos.