Cebu City- Nakatala og 27 ka bag-ong kaso sa coronavirus disease o Covid 19 ang dakbayan sa Sugbo gahapon.
Pero ang nakaayo kay ang maong gidaghanon minos na lang kon itandi sa nangaging mga adlaw.
Si City Legal Officer Rey Gealon, nga maoy mipahibawo sa balita sa ngan ni Mayor Edgardo Labella, miingon nga ang bag-ong mga kaso naggumikan sa nagpadayong mass testings.
Matod ni Gealon, 90 porsyento sa mga pasyente pulos asymptomatic o walay gipakitang timailhan sa virus.
Ang uwahing 27 ka kaso gilangkoban sa pito gikan sa sityo Zapatera, brgy. Luz ug tagutlo sa brgy. Inayawan ug Suba; tagurha sa brgy. Lahug, Mambaling, San Nicolas Proper, ug Tejero; ug tagsa sa brgy. Basak-San Nicolas, Calamba, Duljo-Fatima, Labangon, Pardo, ug Pasil.
Nasuta usab nga sa tulo ka kaso sa Inayawan, duha ang binilanggo sa Cebu City Jail ingon man ang mga kaso sa Basak-San Nicolas ug Pardo.
Niadtong Martes, 91 ang natalang mga kaso sa Covid 19 sa siyudad diin 56 niini gikan sa brgy. Tejero.
Pagka karon, aduna nay total nga 1,687 ka pasyente sa COVID-19 ang dakbayan hinungdang nag-una na kini sa tanang LGUs sa nasod sa labing daghan og kaso.