Malipayon nga midawat sa ilang titulo sa yuta ang 28 ka mga benepisyaryo sa land titling program sa syudad Biyernes, Nobiyembre 12.
Ang mga benepisyaryo gikan sa Barangay Tumpagon, Macanhan Brgy. Carmen, San Juan 1 Brgy. Lapasan, Isla Cupa Brgy. Consolacion, ug Brgy 26. nga ubos sa kanhi Piso-piso program, gawas lamang sa Brgy. Tumpagon.
Alayon niini, gipahalipayan ni Task Force for the Emancipation of Piso-piso Beneficiaries Chairman ug City Councilor Edgar Cabanlas ang mga benepisyaryo nga sa katapusan naangkon na nila ang titulo sa yuta nga ilang gipuy-an ug sa samang higayon nakalingkawas na sa hikot sa pulitika.
Dili na usab sila mabalaka nga papahawaon bisan kinsa pa ang mosunod nga mangulo sa syudad.
Ang paghatag sa titulo sa yuta natuman lamang ilawom sa administrasyon ni Mayor Oscar Moreno uban sa suporta sa mayoriya sa City Council pinangulohan ni Vice Mayor Raineir Joaquin Uy.
Gipasalamatan usab ni Kag. Cabanlas si TFEPB Executive Director Engr. Armen Cuenca ug mga personahi sa ilang walay puas nga pag-atiman ug pag-abag sa mga rekisitos sa mga benepisyaryo diha sa pagpatitulo.
Lakip sa mipahalipay sa mga benepisyaryo sila si City Councilors Maria Lourdes Gaane, Roger Abaday, ug Reuben Daba, uban sa kadagkuan sa DENR, BIR, Registry of Deeds (ROD) ug uban nga mga miyembro sa TFEPB.
(Source: City Information Office | Cagayan de Oro City Philippines Facebook page)
