Mibalik na sa normal nga face-to-face ang pagpahigayon sa flag-raising ceremony kon diin tanang kawani sa Kapitolyo Probinsyal hiusa sa pagpakayab sa nasudnong bandila sa atubangan ug hawanan sa Kapitolyo.
Kini human halos duha ka tuig nga gipahigayon ang nasudnong pagpakayab sa bandila pinaagi sa virtual ug zoom gumikan sa nagpadayong hulga sa CoVid-19.
Adlawng Lunes, Enero 03, 2021 labing unang Lunes sa tuig dako ang kalipay sa tanang empleyado sa Kapitolyo hilabina ni Gobernador Bambi Emano nga subli nabalik na sa face-to-face ang pagpahigayon sa senimanang pagpakayab sa nasudnong bandila.
Ang buhatan sa Environment and Natural Resources (ENRO)- MisOr sa pagpanguna ni Engr. Rene Guingguing maoy host o nanguna sa seremonya.
Malipayon si Gobernador Bambi nga dili na diha sa monitor sa computer makita ang mga hulagway sa mga empleyado apan personal na kini niyang makita ug labaw sa tanan dili na sa lawak nga sirado nga maoy delikado sa Omicron variant.
Apan bisan paman niini pabilin gihapong hagit niini ang maong set-up hilabina prayoridad sa iyang pamunoan ang maayong panglawas sa tanan.
“It’s actually very wonderful to see all of you again standing up not anymore seated in air-conditioned room. Well it might save you, because in an office place it’s so congested and Omicron is there. We accept the challenge that we’ll do this,” sulti ni Gobernador Bambi.
Gisiguro sab sa kagamhanang probinsya nga sa pagbalik niining face-to-face flag raising dili mabutang sa risgo ang seguridad ug gisiguro nga padayon ang pagpatuman ug pagmintinar sa social distancing, pagsuot sa face masks ug pagsubay sa mga safety health protocols batok CoVid-19.
Sa nahabiling adlaw nii Gobernador Bambi isip amahan sa lalawigan dako ang pagtoo niini nga walay pagsulay nga dili mabatokan kung ang tanang katawhan magtinabangay.
Gihangyo usab niini sa mga kawani sa Kapitolyo nga ipadayon ang tinud-anay nga panerbisyo ug siguraduhong dili mabalda bisan pa man sa mga pagsulay o hagit sa panahon.
(Source: PENRO-MisOr | Misamis Oriental Provincial Information Office Facebook page)
