Nagmalampuson ang tulo ka adlaw nga pagpahigayon og booster shots vaccination batok COVID-19 sugod sa unang semana ning bulan sa Enero 2022, sa hawanan sa Kapitolyo Probinsyal nga gidumala sa Provincial Health Office (PHO) sa Misamis Oriental.
Ang Provincial Inter-Agency Task Force (PIATF) nga gipangulohan ni Dr. Jerie Calingasan ang nangulo sa pag-inoculate sa kapin tres-mil ka mga walk-ins sa dakbayan ug sa lalawigan lakip na mga empleyado sa Kapitolyo Provincial.
Taliwala nga wala pa nakadawat sa booster shots ang mga kawani sa PIATF gumikan mas ilang gisiguro nga ma-prioridad ug una ang mga katawhan ug publiko, nagpabilin gihapon nga madasigon ang mga personahe lakip ang mga nurses ug mga doctor nga nalambigit sa maong kalihokan.
Base sa datos nga gihatag ni Ms. Gina Abang, Nurse III sa PHO, mukabat sa 3,997 ang tanang natupukan sa booster shots lakip na niini ang mga nagkadaiyang brands sa COVID-19 vaccines.
Sa Pfizer adunay 2,681, sa Moderna adunay 973, sa Sinovac adunay 203 ug, sa Astra Zeneca adunay 140. Sa kinatibuk-an, mukabat sa 3, 997 ka mga indibidwal ang nakadawat sa booster shots sa gipahigayon nga tulo ka adlaw nga aktibidad.
Prayoridad kanunay sa panggamhanan sa Misamis Oriental ubos sa liderato ni Gobernador Bambi Emano ang kaluwasan ug himsog nga panglawas sa Misamisnon nga mas maproteksyunan pa sa hingpit batok Covid-19 ug variants niini.
(Source: Misamis Oriental Provincial Information Office Facebook page)