Giklaro ni Dr. William Bernardo, acting City Health Officer, nga dili pa malakip ang Cagayan de Oro isip pilot area alang sa initial COVID-19 vaccination rollout alang sa pediatric 5-11 age group kagahapong adlawa, sanglit ang pilot areas anaa pa sa National Capital Region.
Sigon pa ni Dr. Bernardo naghulat pa ang syudad sa dugang gabayan gikan sa Department of Health alayon niini.
Hinuon ang online pre-registration sa maong age-group gilusad na sa syudad niadto pang Enero 6 ning tuig isip pagpangandam sa pagpamakuna.
Mahimong magparehistro pinaagi sa https://services.cagayandeoro.gov.ph:8087/vaccprereg/.
Kahinumduman una nang gibutyag sa DOH nga sugdan ang pagpamakuna sa NCR sa Pebrero 4-5, apan nasibog kini sa Pebrero 7.
Sa laing bahin, sigon pa sa DOH nga ang Pfizer brand maoy nakakuha og emergency use authorization kon EUA niadtong Enero ning tuig gikan sa Food & Drug Administration aron magamit sa pagpamakuna sa 5-11 anyos nga kabataan.
Gipasabot usab sa DOH nga luwas ug epektibo ang nasangpit nga bakuna batok COVID-19.
(Source: CHO | Cagayan de Oro City Philippines Facebook page)
