Subling gipahinumdoman ni Dr. Teodoro Yu Jr., medical officer sa City Health Office, ang publiko sa kanunay pagsul-ob sa facemask, paghugas sa kamot, pagsunod sa ‘physical distancing’, paglikay sa mga tapok-tapok ug lugar nga walay ‘proper ventilation’, pag-obserba sa ‘proper cough ug sneezing etiquette’ ug magpabakuna isip proteksyon batok sa COVID-19 ug mga variants niini.
Sukad sa tuig 2020 sa pagsugod sa covid-19 pandemic, mokabat na sa upat ka mga higayon nga adunay ‘surge’ o pagsaka sa kaso sa COVID sa syudad, ug napamatud-an nga ang hugot nga kooperasyon sa katawhan, pribadong sektor, local ug national government ang depensa batok sa pagkuyanap sa virus.
Gi-awhag usab ni Dr. Yu ang mga senior citizens ug kadtong wala pa nagpabakuna nga magpabakuna na isip depensa sa ‘severe infection’ dala sa COVID-19.
Tanan nga vaccination sites sa syudad adunay priority lanes sa mga senior citizens, buros, mga nagpasuso ug mga ‘persons with disabilities.
(Source: Cagayan de Oro City Information Office | Cagayan de Oro City Philippines Facebook page)
