Gumikan sa hulga sa pandemya sa daghan ang naapektuhan labina gyod ang pagpanarbaho ug usa na niini ang mga kawani sa Kapitolyo Probinsyal nga ang matag buhatan mitunga sa matag adlaw aron padayun nga makapanerbisyo sa katawhan sa lalawigan.
Karng ba ang Employee’s Compensation Commission nagpasiugda sa pagpang-apod og tseke alang sa mga empleyado sa Kapitolyo Probinsyal nga nagpositibo sa COVID-19 karong tuiga.
Siyam ka mga empleyado ang nakadawat og tseke nga nagkantidad og ₱ 10,000.00 matag usa.
Ang Employee’s Compensation Commission usa ka attached agency sa Department of Labor and Employment Office (DOLE-10) nga girepresentahan ni Ms. Stella Mae D. Obice ug Ms. Jannah Batara nga maoy nanguna sa kalihokan.
Ang Employees’ Compensation Program nagtumong sa pagtabang sa mga trabahante gikan sa pribado ug publikong institusyon nga nag-antos sa sakit, nagsakit o namatay nga konektado sa trabaho lakip na ang mga empleyado nga apektado sa COVID-19.
“Amoang mandate gyud is gahatag mi og benefits and services may it be sa public sectors or sa private sectors as long as nagsakit sila, naaksidente, or namatay tungod sa trabaho,” matud ni Ms. Obice ug nipasabot nga wala kini gidahom nga mahitabo sa mga empleyado apan ang ECC motabang sa mga naapektuhan.
“Dili man ta mag-expect nga mahitabo na sa atong mga workers pero at least if ever mahitabo man na sa workers, naa si ECC mutabang sa ilaha on top sa ilang na-avail sa SSS ba, sa GSIS, sa PhilHealth, sa Pag-ibig or unsa pa ilahang insurances,” dugang pasabot niini.
Gisaysay sab niini ang kwalipikasyon aron nga maka-avail sa maong benepisyo kung asa gilangkoban sa RT-PCR test isip pamatuod nga nagpositibo, Certificate of Quarantine Completion, medical record ug certification gikan sa opisina nga work-related ang rason ngano nagsakit kini.
Gumikan sa pandemya, dili sayun ang mataptan sa maong makamatay nga virus apan pinaagi sa maayong pagdumala sa panggamhanan dili mapasagdan ang tanang miagi sa dagkong kalisdanan ug pamatuod kini nga adunay paglaum human sa mga pagsulay.
(Source: Misamis Oriental Provincial Information Office Facebook page)