Aron masigurong luwas ug hingpit na nga mawagtang ang problema sa African Swine Fever sa lalawigan walay puas ang Panggamhanang Probinsyal sa Misamis Oriental pinaagi sa Provincial Veterinary Office (PROVET) sa pagmonitor hilabina kon adunay mga mamatikdan nga nagsakit nga baboy sa nagkadaiyang lungsod sa lalawigan.
Bag-o lang gikuhaan og PCR test ang mga sample sa dugo sa mga baboy diha sa Barangay Sta.Ana ug Maribojoc sa lungsod sa Tagoloan ug sa Brgy. Hinigdaan ug Bolisong sa dakbayan sa El Salvador.
Malipayon nga gipahibalo ni PROVET Head Benjamin Resma niadtong adlawng lunes nga pagpakayab sa nasudnong bandila nga negatibo sa ASF ang maong mga blood sample sa baboy ug pamatoud niini nga walay presensya sa ASF sa nasangpit nga mga dapit.
Kanunay usab nga gipaabot ni Dr. Resma ngadto sa katawhan nga kung adunay gibati sa ilang binuhing baboy dili magpakahilom ug ireport gilayon sa ilang tagsa-tagsa ka munisipyo aron maaksyunan gilayon ug mapugngan ang pagkuyanap niini.
(Source: Provincial Veterinary Office | Misamis Oriental Provincial Information Office Facebook page)