Napili ni Miss Philippines Earth 2021 Miss Naelah Alshorbaji ti Ilocos Norte a pag-shootingan iti agbalin a presentasyonna iti Miss Earth International 2021.
Segun kenkuana, online ti maisayangkat a kompetisyon iti daytoy a tawen ken maipabuya ti Finals intono Nobiembre 21.
Inlawlawagna a karaman kadagiti napipintas a lugar ditoy probinsia a maipabuya iti intero a lubong kabayatan ti nasao a kompetisyon ti Patapat viaduct, Bangui wind mills ken dagiti napipintas a beaches ditoy Ilocos Norte.
Malaksid kadagiti napipintas a buya ditoy probinsia, dinaydayaw pay ni Alshorbaji ti kinamanagsangaili ken kinamannakigayyem dagiti Ilocano
Impalgakna a ti kangrunaan nga itantandudona ket ti pannaka-recycle dagiti plastic a basura a mapagbalin a dekalidad a produkto.
Mapapati a daytoy ti kangrunaan a rason nga inawis ni Miss Jamie Herrell a Miss Earth 2014 ni Alshorbaji gapu ta dakkel a tulong ti itantandudona a ganuat iti pannakasaluad ti aglawlaw a maysa kadagiti kangrunaan a programa ni Gob. Matthew Marcos Manotoc.
Naammoan a kinadua ni Alshorbaji ni Miss Patrixia Sherly Santos a Miss Philippines Air 2020 a bimmisita ditoy Ilocos Norte.
(Source: Provincial Government of Ilocos Norte)
