Awan sarday ti panangpanpanunut ni Mayor Albert Chua no kasano nga ad-adda pay a matulungan dagiti mannalon iti siudad ti Batac.
Paset daytoy iti napinget a kalikagumna a mangipaay ti naan-anay a suporta kadagiti ar-aramiden ni Gob. Matthew Marcos Manotoc para kadagiti mannalon ti probinsia.
Mainaig iti daytoy, inpakaammo ti mayor a nabunungan manen dagiti mannalon nga agmulmula ti tabako ti libre a “knapsack sprayer”.
Imbatadna a nasursuruk ngem innem a gasut a mannalon ti siudad ti Batac ti nabenipisiaran.
Malaksid iti daytoy, kunana a maisaruno a maibunong ti krudo nga usaren dagitoy a pagpasayak kadagiti mulada iti kataltalonan.
Segun pay ken ni Mayor Chua, ididiaya pay ti gobierno ti siudad ti libre a pannakaarado ti pagmulmulaan ti tabako.
Inbunannagna a gapu iti kaadda dagiti nagkiddaw ti tulong ti gobierno ti siudad ti Batac para iti pannakatarimaan dagiti pugon a panglutoanda iti bulong dagiti tabako a birhinia ket nangilatang ti gobierno ti siudad ti lima a milyon a naigatang kadagiti materiales a mausar a pangtarimaan kadagiti nasao a pugon.
Innayonna a ti dakkel a karit kenkuana iti agdama ket ti agtultuloy a pannakaipangato ti presio ti abono gapu ta gesdan metten dagiti kompania iti ballasiw taaw nga agparpartuat ti abono ti ilakoda iti ruar ti pagilianda gapu ta panpanunutenda metten ti agserbi iti bukud da a pagilian.
(Source: LGU Batac City)