Addan iti babaen ti alert level 2 iti probinsia nga Ilocos Norte. Impakaammo ni Gob. Mathew Marcos Manotoc a mangrugi ita nga alda Nobiembre 8 agingga inton Nobiembre 21 ket naibaba iti alert level 2 ti probinsia.
Segun kenkuana, daytoy ket naluklukay ngem iti Modified General Community Quarantine wenno MGCQ. Iti babaen ti alert level 2, maipalubusen a rumuar dagiti ubbing nabakunaan man wenno saan kontra iti covid 19.
Mabalin payen dagiti amusement wenno kids’ industry, contact sports ken daddumma pay a recreational activities ken venues. Uray dagiti konsierto ken music venues pakairamanan dagiti pagsinian.
Mabalin payen iti 50 a porciento ti kaadu dagiti tao iti uneg ken 70 a porciento iti ruar kadagiti restaurants ken dadduma pay nga establisimiento la ketdi fully vaccinated dagiti amin nga agpapaay iti business establishment.
Nupay kasta, impasingked ni Gob. Marcos Manotoc a kasapulan pay laeng ti panangsurot kadagiti safety minimum health protocols kas panagsakbay tapno saanen nga agsubli iti sigud a nangato a bilang dagiti maapektaran iti novel corona virus disease.
(Source: Provincial Government of Ilocos Norte)