Awan pay iti gas assistance a mait ited kadagiti asosasion dagiti mannalon para iti pre- production ditoy ilocos Norte.
Nupay kasta, kuna ni Ilocos Norte Gov. Mathew Marcos Manotoc a nakasagana ti probinsia a mangipaay ti krudo wenno gasolina kadagiti farm equipment ken dadduma pay a pakausaran ti krudo wenno gasoline dagiti mannalon.
Kunana a ti pay laeng mait ited a gas assistance wenno ayuda ket para iti post-harvest kas iti pannakaibiahe ti apit dagiti mannalon a maipan iti sentro a saanen nga ibaklay pay dagiti mannalon.
Kunana nga agtultuloy met iti pannakatulong dagiti mannalon ken dagiti multiple coops iti pannakailako dagiti bukod da a produkto.
Kalikaguman laeng ti gobernador nga adda ti maituding a maikanatad a presyo tapno saan a maabakan dagiti mannalon kadagiti mananggundaway a negosyante.
Kunana a masapul nga adda ti panagsasarita dagiti mannalon, coops ken iti biang ti probinsia pakaseknan iti presyo ken pannakailako dagiti produkto da tapno al alisto a mailako dagitoy iti napintas a presyo.
(Source: Provincial Government of Ilocos Norte)
