Makatulong a mangpapigsa iti kalikagum ni Gobernador Matthew J. Marcos Manotoc a mangpukaw kadagiti plastic a basura ditoy probinsia dagiti inpaay ti Department of Environment and Natural Resources Central Office a baro a plastic recycling equipment.
Imbatad ni Mr. Hashler Garalde iti Environment and Natural Resources Office ti gobierno probinsial nga inimatanganda kaduada ti mangidadaulo ti opisinada a ni Mrs. Estrella Baby Sacro ti pannakaipadas dagiti nasao a kagamitan.
Inlawlawagna na a dagiti plastik a basura ket dumalan iti shredder, conveyor, vacuum ken kalpasanna ket maipan iti pyrolysis a pakatunawan dagiti plastik ken maipan dagitoy iti pagsukogan ti maaramid a tugaw.
Impalgakna nga addaan ti nasao a kagamitan a mangtadtad iti duapulo ket walo a kilo dagiti nalamuyot a plastic.
Nupay kasta kuna ni Garalde a saan a kabaelan ti kagamitan dagiti natatangken a plastic a kas kadagiti botelia a plastic.
Segun pay kenkuana, ti duapulo ket walo a kilo a plastic ket makaaramid ti maysa a tugaw.
Inbunannagna a dagiti nasao a kagamitan ket naiyestablisar iti Brgy. Camangaan ditoy siudad ti Laoag.
Innayon pay ni Garalde a kalikagum ni Gob. Marcos Manotoc a maigiddan ti naan-anay nga operasyon ti nasao a pasilidad iti Materials Recovery Facility ti gobierno probinsial idiay ili a Marcos.
Ti operasyon ti pasilidad iti Brgy. Camangaan ket dakkel a mangsupusup iti al-alisto a pannakapukaw dagiti basura a plastik ditoy probinsia.
(Source: Provincial Government of Ilocos Norte)
