Walay natala nga major crime sa Cebu City sulod sa 24 oras, gikan alas-6 sa buntag kagahapong adlawa Septiyembre 11 hangtod alas-6 sa buntag sa Septiyembre 12, 2026, sumala sa Cebu City Police Office o CCPO ubos sa pagpanguna ni Acting City Director PCOL Ricky C. Sumalde.
Walay kaso sa murder, homicide, physical injuries, rape, robbery, theft, carnapping ug uban pang seryosong krimen nga natala sulod sa maong panahon.
Bisan malinawon ang sitwasyon, nagpadayon gihapon ang operasyon sa kapulisan batok sa ilegal nga drogas, ilegal nga sugal, wanted persons ug loose firearms.
Napulog-walo ka tawo ang nadakpan sa anti-drug operations ug 43.54 gramos nga gituohang shabu, nga nagkantidad og kapin ₱294,032, ang nakumpiskar. Napulo usab ang nadakpan sa operasyon batok sa ilegal nga sugal, samtang ₱5,175 nga pusta ang nasakmit.
Lima ka wanted persons ang nadakpan, samtang usa ka tawo ang nadakpan may kalabotan sa loose firearm. Nakumpiskar usab ang usa ka .22 caliber revolver nga walay serial number ug duha ka buhing bala.
Naghatag usab og seguridad ang CCPO sa Philippine Travel Exchange 2026 aron masiguro ang malinawon ug hapsay nga pagpadayon sa kalihokan. Matod ni Sumalde, magpadayon ang CCPO sa aktibo ug makita nga police presence aron mapamenos ang krimen ug mapaspas ang pagresponde sa mga insidente.
📸 CCPO
I via Renante Socia Lada