Iriga City – Hasta sa ngunian dai na masusog an kinakamugtakan ni PCpl. Erick Cabilao matapos na ini magpa-aram sa saiyang live-in partner na mapasiring sana sa saiyang ina sa Polangui, Albay.
An police na presenting naka-assign sa Baao PNP nagpa-aram kan nagtalikod na petsa 17,2021 mientras na an saiyang kotse nakua kasu-bangui sa Brgy. Lanipga sa banwaan kan Bula na abandonado.
Ipinahayag ni PLt. David Olleres, Deputy Chief of police kan Bula-PNP na kan abutan ninda an lunadan ini yaon sa maray na kondisyon asin mayo nin sinyales na nagkaigua nin komosyon sa laog kan lunadan, alagad an pinag-ngangalas huli ta mayo an police na si Cabilao.
Sa lado kan PNP- Baao, Ipinahayag man ni PMaj. Mary Grace Tagtag na mahiwas na inbestigasyon na an saindang pinag-gigibo tanganing masusog an kinakamugtakan kan nawawarang police.
An police dating assign sa Bulan Sorsogon asin nagin biktima na kan pag-atake kan mga rebelding NPA matapos na apunan nin granada an istasyon kan policia kan 2020.