Manamnama a maiyestablisar ti “Bagsakan Center” para kadagiti produkto dagiti mannalon ditoy Ilocos Norte.
Daytoy ket kalpasan nga inpakaammo ni Sec. William Dar ti Departamento ti Agrikultura a mangipaay ti ahensia iti tallopulo a milyon a pisos para iti nasao a ganuat.
Napanunutan daytoy ti sekretario iti panangdakamat ni Gob. Matthew Marcos Manotoc iti panangikarigatan ti gobierno probinsial a mangtulong kadagiti mannalon a mangilako kadagiti produktoda iti napinpintas a presyo.
Mainaig iti daytoy, ginutigot ni Dar ti gobernador a mangkita ti napintas a lugar a pakaipasdekan ti nasao a proyekto.
Imbatadna a mabalin a ti siudad ti Batac wenno iti sabali a lugar nangnangruna iti maikadua a distrito ti probinsia.
Inlawlawagna a babaen iti pannakaipasdek ti nasao a proyekto ket maipan amin a produkto dagiti mannalon ditoy Ilocos Norte iti nasao a lugar a mabalin a mailako iti sabali a probinsia.
Innayonna nga ad-adda pay a mapapigsa daytoy babaen iti pannakagatang dagiti truck a mangibiahe kadagiti nasao a produkto idiay Manila.
(Source: Provincial Government of Ilocos Norte)
