Gisugdan na sa pagpang-apud-apod sa kagamhanang lokal sa syudad sa Dapitan ang tag-25 kilos nga sako sa bugas ug duha ka mga tibuok manok alang sa matag-bubong o panimalay nga nagsugod sa sayo sa kabuntagon kaniadtong Mayo 12 niining tuiga.
Sa pamahayag nga nakutlo gikan kang Mayor Rosalina Jalosjos nga kini maoy tipik sa iyang gisaad nga ayuda ngadto sa tanang katawhan diin dili siya buot nga adunay mahitabong wala matunoli karung panahon sa kalisdanan.
Alang kaniya angay lamang nga hatagan sa pagtagad ang mga katawhan kinsa tanan apektado sa krisis sa pandemiya.
Mapasalamaton si Mayor Nene Jalosjos ngadto sa mga katawhan sa ilang pagsabot diha sa dyutay nga kalangan sanglit giseguro lamang ang tanang bubong nga mahatagan ning tungora.
Kahibaluan nga kini maoy ikatulong hugna sa pagpanghatag sa relief assistance ngadto sa mga nanimuyong lungsoranon diin adunay duha na ka mga higayon nga mitunol ang syudad pinaagi sa tag 500 pesos nga kantidad sa food vouchers.
Alayon niini, gibahin sa unom ka mga clusters ang food assistance distribution sa unom ka mga clusters diin ang Cluster 1 gipangulohan ni City Agriculturist Cyril Patangan, Cluster 2 ni OIC-CGSO Alvi Agolong, Cluster 3 Engr. Edelito Acbayan, Cluster 4 Engr. Gerry Icao, Cluster 5 City Tourism Officer Apple Marie Agolong ug ang duha ka mga isla sa Selinog ug Aliguay alang sa tanang mga cluster heads.
Mihatag usab sa ilang boluntaryo nga pagserbisyo ang mga reservists sa 93rd Marine Batallion Reserve Dapitan City ubos sa pagpangulo ni LtCol Seth Frederick Jalosjos (Phil Navy/Marines), ug 612nd Naval Squadron Reserve Dapitan City sa pgpangulo ni CPO Romeo Jalosjos Jr, Phil Navy, ingon man mga barangay workers ug mga tanod diha sa paghakot ug pagpladtar sa mga butang padulong sa mga kabarangayan.
Subay niini, gilauman nga magpatigbabaw gihapon ang pag-obserba sa social distancing lakip na ang pagsul-ob sa face mask atol sa nasangpit nga distribusyon.
