Nawalan ng tirahan ang nasa 500 pamilya sa Happy Land Tondo, Maynila matapos na masunugan noong nakaraang Sabado, ika-18 ng Abril.
Batay sa inisyal na imbestigasyon ng Philippine National Police (PNP), maaaring nagsimula ang sunog sa nag-over heat na bentilador sa ikalawang palapag ng bahay na pag mamay-ari ng isang Antonio “Manong” Bullos at Josephine Villamor sa 6-K Sta. Paquita, Barangay 105, Zone 8, Happy Land, Tondo dakong alas-7:31 ng umaga.
Umakyat naman ang sunog sa ika-apat na alarma dakong alas-7:57 at idineklarang fire out bandang alas-9:41 ng umaga.
Wala namang naitalang nasawi o nasugatan sa nangyaring sunog.
Gayunman, hindi naman naiwasang maglabasan ang mga residente sa gitna ng umiiral na 24-oras na curfew kung kaya’t mahigpit na binabantayan ng kapulisan ang mga apektadong pamilya upang patuloy na i-obserba ang physical distancing at pagsusuot ng face mask.
Samantala, tinatayang nasa P1.2-milyon ang halaga ng napinsala ng sunog.
