Maga autoridad por coincidencia ya puede confisca valor de uno punto uno milyones de pesos contrabando y aresta dos personas myentras ta conduci patrulya na uno del maga barangay aqui ciudad de Zamboanga.
Asegun con Coronel Richard Verceles, operations chief del Area Police Command-Western Mindanao, cay con el contrabando ya confisca maga alas nueve y media Huwebes aga na calle Araneta Barangay Sinunuc, este ciudad.
Asegun con Verceles cay antes del confiscacion del contrabando, maga pulis myentras ta man patrulya na calle Araneta, Barangay Sinunuc, ya extende ayuda con dos personas, de quien vehiculo ya mira sila parao na canto’y camino y flat el rueda.
Asegun con Verceles cay maga pulis ya dale presta jack para cambia con el rueda del vehiculo que ta maneja si Benhar Tunggal, treynta anios el edad.
Pero el maga pulis ya discubri cay el vehiculo ta contene treynta’y dos cahon de cigarillo cuando el ayudante de Tunggal, si Aldimar Idjan, treynta anios el edad, ya abre con el vehiculo para saca con el reserva rueda.
El maga pulis enseguidas ya confisca con el maga cigarillo y aresta con Tunggal y Idjan cuando nohay sila puede presenta documento del de ila carga.
Con Tunggal y Idjan, el vehiculo hasta el maga confiscao cigarillo ya lleva na quartel del Police Station 8 para el propio documentacion.
Con el maga cigarillo ya inspecciona el K9 del Philippine Drug Enforcement Agency antes na entrega na custodiya del Buro de Aduana. (Bong Garcia, Jr., photo courtesy of Area Police Command- Western Mindanao)