Maga marines y pulis ya aresta con ocho myembros de un grupo envuelto na bendida de droga ilegal despues qua ya man tirahan sila alla na provincia de Tawi-Tawi.
Asegun con Brigadier General Romeo Racadio, comandante del Segundo Brigada del soldao marino, cay con el maga suspechao ya aresta del Miyercoles na Sitio Upper Maalum, Barangay Magsaggaw, Panglima Sugala, Tawi-Tawi.
Si Racadio ya habla cay antes del tirahan, maga tropa ya recivi informacion cay ta ase rebenta armas de fuego el maga myembro del un grupo envuelto na bendida de droga ilegal que ta encabesa el un tal Akmad na Sitio Upper Maalum, Barangay Magsaggaw.
Si Racadio ya habla cay el tirahan ya ocuri cuando maga mymebros del grupo de Akmad ya sopla de tiro despues que ya columbra sila con el maga tropa ya responde sobre el informacion.
Asegun cay el maga myembros de Akmad ya man atras y ya precura escala pero ya puede canila cuji el maga solda marino y pulisiya.
Si Rascadio ya nombra con el maga arestao como el siguientes: Sala Ahmad; Khyber Boca; Alsaib Sahirun; Hussin Tati Amihaji; Jan-Jan Tati Hussin; Temhar Muhadil Lensahan; Adzmal Kiram Mandih; and, Jullymar Dao Aruyo.
El tropa del govierno ya puede confisca na de ila posesion un pistola, rifle grenade, trese pakete de shabu, maga cellphones, siento sincuenta’y sinco ringgit de Malaysia, seis mil seis sientos treynta’y cuatro pesos, maga cosas personal, diferente clip y bala, documentos, and y otro cosa na uso de droga ilegal.
Con el maga arestao suspechao ya pone bajo el custodiya del pulisiya na municipio del Panglima Sugala para el propio disposicion y formal plantada de asunto na tibunal. (Bong Garcia, Jr., photo courtesy of 2nd Marine Brigade)
