Masadya-ong gisaulog sa mga Persons With Disability (PWD) ang 44th National Disability Prevention and Rehabilitation Week, Septiyembre 9 ning tuiga didto sa Dipolog Sports Complex sa Brgy. Olingan.
Atol sa nasangpit nga kasaulogan, gidasig ni Ms. Arlene O. Jatico, City Social Welfare and Development Officer (CSWDO), ang mga PWD nga dili sila magmakuli sa pagsalmot sa mga kalihukan sa ilang barangay tungod kay ang ilang kabilinggan dili babag aron ipadayon ang ilang mga tinguha.
Samtang gipadayag usab ni konsehal Marilou Y. Calibo, isip representante ni Mayor Darel Dexter T. Uy, ang mensahe sa ulahi, nga ang kagamhanang lokal uban sa konseho, ang kanunay nga nagsuporta ug nagpaluyo sa mga programa sa PWD.
Mitambong usab si Bokal Dante Bagarinao sa Segundo Distrito kinsa nagrepresentar ni kanhi Mayor Evelyn T. Uy, diin gisaysay niya nga bulahan ang mga PWD sa Dipolog tungod kay gipangga kini sa administrasyon pinaagi sa paghatag og panginabuhian ug subsidiya matag kumpara sa ubang lokalidad. Gani, tungod sa ayuda sa siyudad, walay PWD nga taga Dipolog ang nagpalimos.
Gipasundayag usab sa nasangpit nga sektor ang ilang mga talento sa pagkanta ug gipahigayon ang nagkalain-laing dula nga nakadugang sa ka-bibo sa selebrasyon.
Ang 44th National Disability Prevention and Rehabilitation Week ang nagdala sa tema nga “Pamahalaan Kabalikat Sa Pagtupad Ng Pantay Na Edukasyon, Trabaho At Kabuhayan Tugon Sa Pagpapalakas Ng Taong May Kapansanan.”
(News & photo courtesy of Dipolog City Government Facebook page)