Un alegaomente distribuhidor ya muri myentras su compañero el ya aresta maga autoridad na operacion contra droga ilegal na Sitio Pinya, Barangay Bunguiao, este ciudad.
Si Coronel Alexander Lorenzo, el director del Zamboanga City Police Office (ZCPO), ya nombra con el muerto supplier de droga ilegal como si William Dionisio, treynta’y ocho años el edad y residente del Sitio Baluno, Barangay Bunguiao.
Con el arestao compañero de Dionisio ya conose como si Vincent Delos Reyes, treynta’y sinco años el edad y residente de Sitio Manga, Barangay Bolong, este ciudad.
Asegun con Lorenzo cay si Dionisio ya muri ya man tirahan sila durante el operacion contra droga ilegal maga alas sinco trese del Domingo tarde alla na Sitio Pinya, Barangay Bunguiao.
Asegun con Lorenzo cay base na investigacion, ya ocuri el tirahan despues si Dionisio ya aranca su pusil y ya tira cuando ya gole ele cay un pulis con quien ele ta ase transaccion de droga ilegal.
Si Lorenzo ya habla cay el otro compañeros del pulis enseguidas ya ase balus y ya tupa el tiro na pecho de Dionisio que ya causa su muerte.
Asegun con Lorenzo cay el maga operativas ya recubri na hideout del maga suspechao sesenta gramos de alegao shabu que tiene el cantidad de cuatro sientos ocho mil pesos, un riple carbine, un KG9 9-millimeter pistola, un caliber cuarenta’y sinco pistola y maga bala, un cellphone, setenta’y nueve pedaso del mil pesos “boodle money” que ya pone insima un orihinal mil pesos como markao sen.
Con Delos Reyes ya detene na quartel del ZCPO myentras ta prepara el maga documentos para el plantada de formal asunto na tribunal contra conele.
Asegun con Lorenzo cay si Dionisio amo el distribuhi droga ilegal na Barangay Bunguiao y na maga sercanos barrio na costa iste del ciudad.
Si Dionisio alegaomente envuelto taman na maga incidente de holdap, extorsion, caranapping y robo de maga animal na costa iste del ciudad de Zamboanga. (Bong Garcia Jr.)
