Ya reitera el Presidente Ferdinand Marcos Jr. su orden con el Buro de Aduana (Bureau of Customs) para intensifica pa mas el campaña contra el entrada del mga contrabando, especialmente aros, aqui na pais.
El Presidente ya reitera su orden cuando ya encabesa le con el distribucion del 5,000 saco de 25 kilos aros con mga miembros del “Pantawid Pamilyang Pilipino Program (4Ps)” aqui na Region 9 o Zamboanga Peninsula.
El 5,000 saco de aros parte del 42,180 saco de “smuggled” aros con el valor de P42 millon que ya confisca el BOC durante el ataque na un bodega na Barangay San Jose Gusu, en este ciudad del Mayo 19, este año.
Si Marcos ya habla cay ya confisca el BOC con el mga aros despues que ya falla el dueño explica si onde sila ya paga impuesto para el importacion del mga aros dentro de 15 dias plazo.
“Ya pasa ya el 15 dias plazo y nohay sila puede contesta poreso ya confisca ya el customs con el mga aros y ya dona na DSWD y despues ay dona tamen el DSWD y el govierno con ustedes,” si Marcos ya habla durante el un programa adentro na bodega de National Food Authority (NFA) aqui na ciudad de Zamboanga.
Bien alegre el mga beneficiarios del aros y todo sila ya toca mano cuando ya uwi sila el anuncio del Presidente durante el programa.
El mga beneficiarios de aqui na ciudad amo mga residentes del mga barrio de San Roque, San Jose Gusu, Mariki, Rio Hondo, Sta. Catalina, y Kasanyangan
El Presidente Marcos quien ya llega Martes aga aqui na ciudad Zamboanga ya enderesa una para na municipio de Tungawan na provincia del Zamboanga Sibugay donde ya encabesa le con el distribucion del mil saco de aros en aquel lugar.
Despues el distribucion na Tungawan, ya bira el Presidente para na ciudad de Zamboanga y ya man derecho para na bodega del NFA na Barangay San Roque donde ya encabesa tamen ele el distribucion del 3,000 saco de aros con mga miembros del 4Ps.
Ya distribuji tamen el DSWD 1,000 saco de aros para con mga miembros del 4Ps na municipio de Sibuco na provincia del Zamboanga del Norte.
Mientras tanto, ya distribuji tamen el Presidente mga ayuda estaba na Departamento de Agricultura, Oficina de Pesca y Recursos Acuaticos, y del Departamento de Trabajo y Empleo con mga intendido beneficiarios aqui na ciudad. (B. Garcia) (Photo Courtesy of PIA-9)
