El Departamento de Bienestar Social y Desarollo (DSWD) ya distribuji comida enpaquetao para de familia (Family Food Packs) con mga familias afectao na avenida na cuatro barrio aqui na ciudad de Zamboanga del Domingo.
El oficina regional del DSWD ya anuncia del Martes cay total de 378 familias el ya recivi FFPs desde’l agencia que ya distribuji por medio del Oficina de Bienestar y Desarollo Social del Ciudad (CSWDO).
Na total de 378 familias, 65 de ila desde Barangay Tugbungan, 33 de Guiwan, 180 de Tumaga, y 100 de Sta. Maria.
Asegun con el DSWD, el distribucion del ayuda ya ase cada barrio uno despues del otro.
El DSWD ya habla cay cada un paquete de ayuda ta contene aros, café, bebida de chocolate, y productos enlatao.
Durante el distribucion del ayuda, ya man hunto el Alcalde John Dalipe y Vice Alcalde Josephine Pareja con el mga representantes del DSWD na distribucion del ayuda.
El govierno local ya distribuji tamen mga manta, petate y otro cosas pa como inicial ayuda con el mga afectao familias. (B. Garcia) (Photo Courtesy of John Dalipe FB Page)
