Cuatro miembros del un grupo de mal elementos del sociedad quien ta suporta con el terorista Dawlah Islamiya el ya aresta mga autoridad na provincia del Sur Cotabato, el militar ya anuncia del Martes.
Asegun con Major General Steve Crespillo, el comandante del Western Mindanao Command (Westmincom), con el cuatro suspechao ya aresta na un implementacion de orden de aresto del Domingo na Sitio Bunawan, Barangay Polonuling, Tupi, Sur Cotabato.
Con el mga arestao suspechao ya conose como canda Angelo Abul, Melvin Ditan, John Ditan, y si Gabriel Palucan, to legal el edad y residentes del Barangay Polonuling, Tupi.
Asegun con Crespillo, con el cuatro ya aresta por causa de ilegal posesion del pusil y droga ilegal. Mga “supporters” sila del “Dawlah Islamiya-Maguid group”
Ya puede confisca na de ila posesion dos calibre .45 rifle Thompson, un calibre .38 revolver con mga bala, un granada, y mga droga ilegal.
Sin embargo, el objeto na implementacion del orden de aresto, si Rex Soliman alias Latif, el lider del grupo, ya puede evita aresto.
Con el mga arestao suspechao y mga evidencia ya entrega na custodiya del pulisiya na municipio del Tupi para el proprio disposicion.
Si Crespillo ya comenda con el mga soldao y pulis quien envuelto na operacion por el de ila buen acomplisimiento.
“Esta ustedes asegurao cay ay continua came suporta con el diamon mga uban na implementacion de leyes para nuetraliza con el amenazo del la sociedad,” asegun con Crespillo. (B. Garcia) (Photo Courtesy of Westmincom PIO)
