El mga autoridad ya puede confisca valor de P6.8 millones shabu na un campaña contra droga ilegal na provincia del Maguindanao del Norte, asegun con el Philippine Drug Enforcement Agency na Bangsamoro Autonomous Region in Muslim Mindanao (PDEA-BARMM) del Miercoles.
Sin embargo, asegun con el PDEA-BARMM, el suspechao nombrao lang como un tal Dats ya puede escapa amediante el tirahan que ya ocuri durante el campaña contra droga ilegal na carritera del Barangay Tapayan, Sultan Mastura, Maguindanao del Norte del Martes.
Asegun con el PDEA-BARMM, ya puede recubri durante el operacion un kilo de shabu que tiene el valor de P6.8 millones
Asegun con el PDEA-BARMM, ay planta sila formal asunto contra con Dats por violacion del Comprehensive Dangerous Drugs Act of 2002.
Asegun con el PDEA-BARMM, el suspechao uno del mga conosido vendedor de droga ilegal na Maguindanao del Norte y na mga sercanos lugar.
El operacion contra con Dats es un esfuerzo de colaboracion entre el PDEA-BARMM, 601st Mechanized Infantry Battalion, Marine Battalion Landing Team-2, y policia del Sultan Mastura y Maguindanao del Norte.
(B. Garcia, photo courtesy of PDEA- BARMM)