Dos personas, un hombre y un mujer, el ya aresta mga otoridad na campanya contra droga ilegal na Zamboanga del Norte y na Basilan.
Con el mga arestao suspechao ya nombra el pulisiya como canda Oliver Cabilitazan, 37 años el edad, y si Sorayda Usari, 53.
Asegun con Police Colonel Glenn Dulawan, el director del pulisiya na provincia del Zamboanga del Norte, cay con Cabilitazan ya aresta mga alas 10:42 del Miyercoles aga na Barangay Galas, ciudad de Dipolog.
Asegun con Dulawan ya puede confisca desde’l posesion de Cabilitazan tres gramos de suspechao shabu con el valor de P20,400, un celopen, y P1,000 markao sen.
Asegun con Lieutenant Colonel Parson Asadil, el hefe del pulisiya na ciudad de Isabela, Basilan, cay con Usari ya aresta mga alas 5:15 del Miyercoles tarde na Purok 3, Barangay Diki na isla de Malamawi.
Si Asadil ya habla cay ya puede confisca na posesion de Usari 4.5 gramos de suspechao shabu con el valor de P30,600, un pitaka, y P500 markao sen.
Ambos si Cabilitazan y Usari el detenido ahora en preparacion para el plantada del asunto encontra canila dos.
(B. Garcia)