Mitala og pagkunhod sa waste generation per day ang Cagayan de Oro pinaagi sa pagpatuman sa ‘No Segregation, No Collection Policy’ sa syudad.
Matud ni Engr. Armen Cuenca, hepe sa City Local Environment and Natural Resources Office (CLENRO), nga pinaagi sa nasugdang ‘no segregation, no collection policy’ sa Brgy 1-40 ug implementasyon sa ‘No to Single Use Plastic’, mikunhod ang waste generation matag tawo.
Gipasabot ni Engr. Cuenca nga basi sa waste generation study nga ilang gihimo sa 2021, mikunhod ngadto sa .38kg/person/day ang basura gikan sa .76kg/person/day sa 2014.
Subay niini, hingpit na usab nga sugdan ang ‘No Segregation, No Collection’ policy sa Brgy Carmen sa miaging semana, atol sa pgsaulog sa ‘Earth Day 2021’.
Pangulohan sa CLENRO ang implementasyon niini subay sa City Ordinance 13378-2018 o’ Integrated Ecological Solid Waste Management ning syudad.
Naglaum ang kagamhanang lokal nga pinaagi sa pagpatuman sa ‘no segregation, no collection policy’ sa Brgy Carmen sugod ugma’ng adlawa ug sa uban pang kabarangayan, mas moubos pa ang waste generation sa syudad. (ACM)
