Ikatulo sa ihap sa mga girespondihan sa Emergency Medical Service o Emergency Response Services (ERS) ang vehicular accident o mga disgrasya sa sakyanan sa kadalanan.
Kini basi na sa ulahing Accomplishment Medical Run Report nga atong nahipos alang sa bulan sa Hulyo 2020 nga mitala sa 38 ka mga pasyente diin ang 30 niini mga kalalaken-an ug ang 8 mga kababayen-an.
Gawas sa naandang pagresponde sa medical runs, obstetric cases, ug CVA/Hypertension, aduna’y ilang narespondihan nga 2 ka lalake nga biktima sa gunshot wound (GSW) ug 1 ka lalake sa Suicide incident. Sa kinatibuk-an, miabot sa 431 ka indibidwal/pasyente ang ilang naserbisyohan/narespondihan sulod sa maong bulana lakip na ang nag-expired o no pulse ug no breath.
Taliwala sa ilang mga pagpaningkamot nga madala ang tanang narespondihan ngadto sa balay tambalanan, aduna pa gihapon 19 ka pasyente ang nagdumili. Usa sa mga rason ang mahadlok silang matapnan ug CoViD-19 sa ospital busa gipili na lamang nilang magpabilin sa ilang tagsa-tagsa ka panimalay human sila makuhaan ug mga vital signs. (Jun Prex Salubre, Ronda 6 RPN DXKS)
