Impasigurado ni Provincial Veterinarian Dr. Loida Valenzuela a napagalerton dagiti amin a Local Government Unit, City ken Provincial Veterinary Office a mangkita kadagiti slaughter house.
Namunganay daytoy a tignay kalpasan nga agraira ti sakit nga African Swine Fever wenno ASF a sakit dagiti dingen kangrunaanna idiay Solsona ken Dingras.
Napagtignay dagiti maseknan nga otoridad tapno malapdan iti ad adda pay a panagwaras ti ASF ditoy probinsia. Maipalagip nga immuna a nagraira idiay Solsona ken Dingras ti ASF a pilit a naikali dagiti naapektaran a taraken a baboy dagiti umili.
Kuna a nabilin metten kadagiti barangay official’s nga ireport no adda dagiti masiiman nga agsakit a baboy kangrunaanna kadagiti barangay nga immunan a nagturungan da.
Dinakamat na a no adda dagiti madlawan a madi iti pangan ken awan ti ganaygay da a baboy ket ireport laeng kadagiti maseknan nga otoridad.
Nakiddaw pay iti panagbalin nga alerto kadagiti sumsumrek a truckers kadagiti borders ti Ilocos Norte nga amirisen a nasayaat no adda met laeng iti umno a papeles dagiti maiserrek a dingwen ditoy Ilocos Norte kas maysa a wagas tapno malapdan iti mabalin pay a pannakaiserrek dagiti animal a naapektaran iti nasao a sakit. (Cita Macalipis, RPN DZRL Batac Correspondent)
(Source: Provincial Government of Ilocos Norte)
