Cebu City- Mihatag na og verbal nga pagtugot si Kalihim Arthur Tugade sa DOTr o Department of Transportation sa pagpabalik sa biyahe sa tradisyonal nga mga dyip sa probinsiya sa Sugbo.
Mao kini gipahibawo ni Gob. Gwendolyn Garcia sa mga sakop sa media sa Kapitolyo.
Matod ni Garcia, mihatag og vergal agreement si Tugade sa mao niyang request.
Gitug-an ni Garcia nga nanawag siya kang Tugade gahapon sa udto para pagpadangat sa iyang hangyo nga itugot ang pagpadagan sa mga dyip de pasahero sa kadalanan sa lalawigan basta moagi sa road worthiness inspection sa Land Transportation Office o LTO 7.
Gisultihan ni Garcia ang mga drayber ug operator nga magpaabot una sa  guidelines sa DOTr sa dili pa sila mosugod pagpamasahero sa ilang tagsatagsa ka rota.
Hinuon, ang  Land Transportation Franchising & Regulatory Board o LTFRB-7 giingong mitugot na sa biyahe sa mga traditional jeeps sa gitawag og feeder routes.
Apan si Director Eduardo Montealto, Jr. mitataw nga wala  pa silay giisyo nga SPO o special permit to operate sa mga PUJ nga mobiyahe sa  feeder routes.
Matod ni Montealto, wala pa usab silay nadawat nga application sa SPO apan ang mga operator hayan nagpadayon pag-andam sa partisyon sa ilang yunit ug pag-comply sa mga rekisitos sa paglukat og special permit. I via Jhon Tadlip/ JTY
