Padayon nga nakatutok ang duha (2) ka task force nga gimugna sa probinsya sa Sarangani taliwala sa ginabantayan pud nga dili makasulod nga Coronavirus.
Anaa sa mahugtanon nga pag-monitor ang Task Force ASF kon African Swine Fever ug ang Task Force Sulong Kalikasan subay sa kamanduan ni Governor Steve Chiongbian Solon.
Segun ni Doctor Roy Mejorada, ang assistant provincial veterinarian ilalum sa opisina ni Sarangani Provincial Veterinarian Doctor Bernard Cababat, ila ng gilubong human sa pagsunog ang mga nakumpiska nga mga processed meat product sa veterinarian quarantine checkpoint sa Malungon Gamay gikan sa Davao.
Gilangkuban sa chorizo, tocino, siomai, embutido, lumpia ug chicharon.
Gidid-an sa gihapon nga makasulod ang gikan sa Davao Region maong gipangkumpiska ug gipangsunog, kuyog ang mga personahe sa Malungon Municipal Police Station ug Malungon Municipal Agriculture Office sa pagpanguna ni Mayor Tessa Constantino, Department of Agriculture Region 12, National Meat Inspection Service Regional Technical Operation Center ug Provincial Agricultural Program Coordinating Office.
Aron dili matangag sa iro ug uban pang mananap gumikan virus gihapon ang tinubdan sa African Swine Fever, gipanglubong kini sa yuta.
Ang nakumpiska nga meat products sa Malungon atong Mayo 14 mukabat sa 2,197 kilos ang nasundan pa atong Mayo 23, Mayo 27 ug Mayo 28 apan ginagmay na lang anaa na lang sa mga 50 kilos matag palusot.
Tinuyuan ang pagpalusot tungod ginatago kini pinaagi sa pagputos sa karton sa prutas nga mansanas. Ginasakay pud sa L300 van imbes sa refrigerated container van.
Maong padayon ang panawagan ni Doctor Mejorada sa mga taga-Sarangani Province, ug bisan sa Gensan ug kasikbit lugar.
Dili tiaw matud pa ang mahitabo sa industriya sa babuyan ugaling malutsan ang probinsya sa Sarangani.
Sa kasamtangan, giila sa Department of Agriculture nga free zone ang Maasim, Kiamba ug Maitum, Sarangani Province ug ang dakbayan sa Heneral Santos.
Buot pasabot, pwede silang makabaligya sa ilang binuhi ug karneng baboy sa bisan asa.
Samtang, ang Malungon, Glan, Alabel ug Malapatan ang wala gihapoy kaso sa ASF apan anaa sila sa klasipikasyon nga protected zone tungod katapad nila ang infected zone nga Davao Occidental, ug ang Davao City nga anaa sa buffer zone tungod sa pipila ka kaso sa ASF. Free zone ang South Cotabato ug Sultan Kudarat.
Sa pikas nga bahin, gikan Mayo hangtud ning tungura, siyam (9) kabuok mga sawmill kon bansuhan sa lungsod sa Maitum ang gipangsiraduan sa Task Force Sulong Kalikasan gipangunahan sa DENR pinaagi sa CENRO Kiamba, mga kapulisan, LGU Maitum gidumalahan ni Mayor Bryan Reganit ug sa PENRO Sarangani sa pamunuan ni Governor Solon tungod walay mapakitang DENR permit partikularminte ang wood processing plant permit.
Matud pa ni Doctor Ali Hadjinasser, ang labaw sa CENRO Kiamba, illegal ang operasyon maong ilang gipang-dismantol ug gipangkumpiska ang mga blade sa makinarya aron dili makalaras og mga kahoy. Tagaan silag higayon nga makakuha og mga dokyumento apan kadtong dili gyud makatuman ang mag-atubang og kaso.
Lauman pa ang mga pagpangkumpiska walay laing katuyuan kundili ang padayong pag-protekta sa nahabiling kalasangan taliwala sa COVID-19 pandemic, sa pagsuporta kana nila Vice Governor Elmer De Peralta, mga board member, mga mayores, nila Senador Manny ug Congressman Ruel Pacquiao,PNP ug AFP, katambayayong ang mga barangay-sitio official ug auxiliary volunteers.
