CAGAYAN DE ORO CITY- Usa ka 34 anyos nga babaye nga taga barangay Carmen ning syudad sa Cagayan de Oro ang nakabsan sa kinabuhi niadtong miaging gabii tapos kini nagpositibo sa SARS-COV 2 diin mao kini ang pinakaulahing konpirmadong kaso sa sakit sa coronavirus sa syudad. Sa pagka karon aduna nay 15 ka mga confirmed cases sa CDO ug ika-unom siya sa konpirmado sa Barangay Carmen ug ikatulo nga namatay gikan sa maong area.
Matud pa ni Dr. Bernard Rocha, ang medical specialist sa Northern Mindanao Medical Center nga ang maong 34 anyos nga babaye gidala sa tambalanan gumikan sa hilanat ug naglisod sa pagghinhawa. Tulo ka adlaw sa wa pa kini gidala sa hospital, nakasinati na ang maong biktima sa abdominal pain nga dunay pagsuka-suka ug nagkinaugalingon pagpanambal nga walay konsultasyon gikan sa doctor.
Nalipong na kini paghidangat sa tambalanan. Gideklara kining patay nga adunay acute respiratory failure secondary sa Covid-19 infection nga maoy hinungdan nga siya nabugtuan sa kinabuhi.
Matud pa ni Rocha, ang namatay usa ka peanut butter ug pulvoron maker samtang kini gabaligya sa mga kauban sa iyang pamilya.
Si City Health Office Epidemiologist Dr. Joselito Retuya nagbutyag nga 10 na ka close contact sa namatay apil sa amahan niini ug sister in law ang ila na nga gipailawom sa quarantine.
