Cebu City- Nagkahurot na ang suplay sa dugo sa SNBCV o Sub-National Blood Center for the Visayas, nag-unang blood service facility sa Kabisay-an.
Taliwa sa community quarantine ug sa kahadlok sa publiko sa coronavirus disease o COVID-19, giangkon sa kadagkoan sa panglawas nga ang ilang pundo sa dugo nga mahimong makuha sa tanang ospital sa gobyerno sa rehiyon hapit na mahurot ug maglisod sila pag-replenish.
Si Dr. Mary Jean Loreche, tigpamaba sa Covid 19 sa DOH 7, miingon nga hangtod gahapon, tulo na lang ka yunit sa type O+ nga dugo ang nahibilin sa SNBCV.
Atol sa virtual presser nga gipabati sa Phil. Information Agency o PIA 7, si Loreche miingon nga ang subnational blood center, nga maoy nagsangkap og dugo sa rehiyon, nahutdan na og dugo.
Subay niini, mihangyo si Loreche sa publiko nga modonar og dugo ug sa samang higayon mipasalig nga luwas ang pag-apil sa gipasiugdahang nilang bloodletting activities bisan sa nagpadayong krisis sa Covid 19.
Gitug-an ni Loreche nga ang ilang blood donation teams usahay dili pasudlon sa barangay o sityo nga buot nilang himoan sa mobile donation drive kay ang ubang mulupyo nahadlok nga carrier sila sa virus.
