Cebu City- Lima ka barangay kapitan sa dakbayan sa Sugbo ang giisyohan og show-cause order sa Department of Interior and Local Government o DILG-7 tungod sa taho sa pagpahigayon og tapok-tapok bisag ubos sa ECQ o enhanced community quarantine ang siyudad.
Si Director Leocadio Trovela sa DILG 7 miluwat sa maong mga show-cause order batok nila ni Kapitan Catalina Cabardo sa Basak-Pardo, Harry Eran sa Cogon-Pardo; Lourdes Ramirez sa Sto. Niño; Clifford Jude Niñal sa San Nicolas Proper, Michael Gacasan sa Guadalupe ug mga sakop sa Sanguniang Barangay.
Ang mga mulupyo sa Basak-Pardo gitaho nga nagsugal sa usa sa mga sudlonong dalan sa barangay.
Sumala pa sa DILG, ang maong binuhatan dayag nga nakalapas sa Republic Act 9287 o “An Act Increasing the Penalties for Illegal Numbers Games Amending Certain Provisions of PD 1602 and for Other Purposes,” ug sa pagdili sa mass gatherings.
Samtang sa Cogon-Pardo, gitahoang pagduwa og basketbol sa gawas sa balay bisag gidili ang tapok-tapok.
Sa brgy. Sto. Niño, gitaho ang pagpanggawas sa mga tawo lakip sa mga bata nga walay facemask ug wa pagtagad sa stay at home order sa mga nag-edad og minos sa 21 anyos.
Sa San Nicolas Proper, gihimo ang pag-apod-apod sa bugas sa karsada ug bisag panahon na sa curfew.
Samtang sa brgy. Guadalupe, nabantayan ang ubang mulupyo nga nagkanta-kanta ug nag-inom-inom sa bakanteng luna, adunay nagtigbakay ug midugok sa poultry o manokan nga walay facemask.