Cebu City- Giagni ni Kong. Pablo John Garcia sa ikatulong distrito sa Sugbo ang mga tagdumala sa pantalan ug kadagkoan sa customs nga susihon ang tanang bodega ug ubang storage facilities sa mga materyales nga posibleng makahatag og peligro sa duol nga mga panimalay.
Gipasupot ni Garcia ang maong hagit nunot sa pag-ulbo nga mitumaw sa Beirut, Lebanon nga mipatay og kapin na sa 100 ka tawo ug misamad sa sobra sa upat ka libo.
Gani, labing minos duha ka Pinoy ang nakalas, walo ang naangol ug 12 ang missing, sumala pa sa Department of Foreign Affairs.
Basi sa pamahayag sa kadagkoan sa Lebanon, ang pag-ulbo hayan naggumikan sa kapin sa 2,700 ka toneladang ammonium nitrate nga nasakmit gikan sa usa ka barko ug gibutang sa bodega niadto pang 2014.
Alang ni Garcia, ang maong trahedya magsibing pamukaw sa mga awtoridad sa pagmatngon nga dili motumaw ang susamang hitabo dinhi sa ato.
Sa iyang statement, ang magbabalaod miingon nga ang sulod sa mga bodega sa port area sa Sugbo angayang bantayan tungod kay daghang sinakmit nga mga container van ug kargamento ang gitagoan sud na sa dugayng panahon. I via Jhon Tadlip/ JTY
(Source: Cebu Provincial Government)