Magpapasaklolo na si Solicitor General (SolGen) Jose Calida sa Court of Appeals (CA) upang pag-aralan ang desisyon ng Makati Regional Trial Court (RTC) Branch 148 na nagbasura sa motion for arrest ng Department of Justice (DOJ) kay Senador Antonio Trillanes IV.
Ayon kay Justice Secretary Menardo Guevarra, maghahain ang solgen ng petition for certiorari sa CA upang kuwestyunin ang desisyon ni branch 148 Judge Andres Soriano na isang grave abuse of discretion.
Sa October 22 resolution, pinagtibay ng korte ang constitutionality ng Proclamation 572 ni Pangulong Rodrigo Duterte na nagpapawalang-bisa sa amnesty ni Trillanes matapos ang kasong rebelyon kaugnay sa 2003 Oakwood Mutiny at 2007 Manila Peninsula Siege.
Gayunman, ibinasura ni Judge Soriano ang mosyon ng DOJ na mag-issue ng mandamiyento de aresto at hold departure order laban sa mambabatas.
Posibleng ihain ng Solicitor General ang petisyon bago magtapos ang Disyembre o sa unang bahagi ng enero ng susunod na taon.
