Cebu City- Sunod semana na ipanghatag ang ikaduhang hugna sa hinabang ubos sa SAP o Social Amelioration Program sa Sugbo.
Kini ang gipahibawo ni Shalaine Lucero, asst. director sa Department of Social Welfare and Development o DSWD 7.
Hinuon, sumala pa ni Lucero, nagpaabot pa sila sa kompirmasyon sa ulohan nilang buhatan kon asa sa 132 ka LGUs o local government units sa rehiyon ang malakip sa ikaduhang yugto sa distribution sa ayuda.
Matod ni Lucero, gisultihan sila sa ilang ulohang buhatan nga malagmit sa sunod semana ila nang mahatag ang second tranche sa cash aid.
Gitug-an ni Lucero nga ila nang nailhan ug gisumitir ang napu ka LGUs nga nakakompleto sa encoding process sa ngan sa mga benepisyaryo.
Midugang siya nga sagad sa maong mga LGUs nahimutang sa northern Cebu ug Talisay City.
Duha sa sa mga LGUs sa amihanang Sugbo giisip nga geographically isolated ug disadvantaged areas busa kinahanglan kining mahatagan sa hinabang pinaagi sa special disbursing officers sa ahensiya.
Nagkanayon si Lucero nga ila nang gi-finalize ang importanteng mga detalye sa distribution process sa ikaduhang hugna sa SAP assistance katimbang ang Land Bank of the Philippines (LBP) ug participating financial service providers.