Cebu City- Gi-lockdown ang CTO o city treasurer’s office sa dakbayan sa Mandaue sugod gahapong adlawa, Hulyo 1, hangtod sa Biyernes, Hulyo 3.
Gihimo kini dihang usa sa mga empleyado ang nagpositibo sa coronavirus disease o COVID-19.
Segun sa abiso sa social media, ang CTO miingon nga ilang ipahigayon ang “comprehensive decontamination procedures” sulod sa tulo ka adlaw.
Gipasalig sa CTO sa publiko ug mga magbubuhis nga hugot gipatuman sa opisina ang health standards hinungdang ilang gilimitahan ang face-to-face transactions.
Nagkanayon ang CTO nga padayon silang motubag sa mga pangutana ug ubang katuyoan sa ilang mga kliyente pinaagi sa ilang pahina sa Facebook.
Hinuon, gitataw sa CTO nga mobalik ang ilang normal operation sa Lunes, Hulyo 6.
Giangkon usab sa CTO nga ang ilang sakop nga gi-Covid naadmit pa sa ospital sa Mandaue.
Ang naasoyng pasyente wala na motambong sa trabaho sukad niadtong Hunyo 24 dihang gitambagan nga mag-home isolation.
Gitataw usab sa treasurer’s office nga ang naasoyng kawani wala madestino sa public transactions.